Ukugcinwakulondolozwa kwendlelakuphila nosikompilo abangamaZulu ezibayeni: ucwaningo olubheka imboni yamatekisi

Abstract

Lolu cwaningo “Ukugcinwakulondolozwa kwendlelakuphila nosikompilo lwabantu abangamaZulu ezibayeni: ucwaningo olubheka imboni yamatekisi”, luhlose ukuveza ukuqhakanjiswa kosikompilo lokuphilisana nokubumbana embonini yamatekisi esifundazweni sase-Gauteng, edolobheni lase-Johannesburg. Lolu cwaningo lugqugquzelwe ukuthi imibhalo eminingi yesiZulu ayibukeki ikhuthaza okungamasiko namagugu esizwe sikaZulu kanti le mboni ibukeka izibophezele empilweni yesizwe sikaPhunga noMageba. Abantu abangamaZulu bayakholelwa kakhulu ukuthi umnumzane womuzi kumele abe nemfuyo ukuze akwazi ukuhlonipheka futhi ondle umdeni wakhe. Isibaya siqukethe isithunzi somnumzane. Isibaya siyinsika yomuzi. Izinkomo nazo ziyaphuma ekuseni ziyodla ukuze zikwazi ukusengwa kutholakale ubisi, kudliwe ekhaya. Yilapho kusengwa khona, kuhlatshelwa khona, kugcinwe khona amasiko alowo muzi kuphinde futhi kutholakale umquba kutshalwe. Isibaya yilapho kunqwabelene amagugu omndeni futhi siyinqolobane yala magugu. Izinkomo zinezinsuku ezihanjiswa ngazo ediphini ukuze zihlale ziphila kahle njalo. Izinkomo ziba nophawu olukhombisa ukuthi zingezakwabani. Kunemizila lapho izinkomo zihamba khona uma ziya emadlelweni noma ediphini. Nalapha embonini yamatekisi abantu angamaZulu kwenzeka okufanayo kubona, babuka amatekisi njengezinkomo zabo. Amatekisi nawo anezikhumulo zawo lapho ehlala khona njengazo phela izinkomo ezibayeni. Amatekisi awukhezo abadla ngalo oluletha isinkwa etafuleni ngenhloso yokuxosha ikati eziko. Njengezinkomo, amatekisi nawo ayaphuma ekuseni ayosebenza ukuze kutholakale imali. Ngezikhathi zamakhefu ayanakekelwe uma efile, ahlanzwe, kuphinde futhi kube nemiqhudelwano lapho lapho kubonakala itekisi okuyilona elihle ukunawowonke. Nasemaqeleni ngokunjalo, kuba nemiqhudelwano yezinkunzi, ziqhathwe kubonakale edla mhlanganiso. Amatekisi nawo aba nekheli elikhombisa ukuthi lingelakwabani. Amatekisi nawo anemizila lapho ahamba khona uma esebenza. Ukubuyekwezwa kwemibhalo esondelene nalolu cwaningo kuveze ukuthi abahlaziyi abathile banemibono eyahlukene ngomlayezo oqukethwe usikompilo. Lolu cwaningo lubheke yonke lemibono lwase lwaqhamuka nombono owahlukile. Lolu cwaningo luphawula ngokufika kwesikhathi soguquko ezweni laseNingizimu Afrika, kwangena intando yabantu nomthethosisekelo omusha ongacwasi ngokwebala, ubuhlanga, inkolo nobulili. Kuyavela ukuthi ukuguquka kwesimo sezombusazwe kushintshe indlela abantu abaphila ngayo. Imibhalo eminingi egxile kusikompilo iphonsa inselelo iphinde igcizelela ukuthi abantu baphile futhi bangawalahli amasiko abo. Ukugcinwa kwamasiko kubumba isizwe ukuthi singahlakazeki ukuze kulondoloke amasiko adluliselwe esizukulwaneni esilandelayo. Le mibhalo iphinde futhi ikhuthaze ukuzwana nokubekezelelana kwezinhlanga ezakhele leli zwe, ezahlukene ngokwamasiko. Ngaphandle kokuthi le mibhalo iyakhuthaza, iyisibuko sikaZulu lapho izizukulwane ziyokwazi ukuzibuka khona. Ziziqhenye ngobuzwe bazo. Ucwaningo luveza nezimbangela ezenza ukuthi abantu bagcine sebekhohlwa amasiko abo. Izinguquko zigqame kakhulu emumva konyaka we-1994 okwakungunyaka abantu abaqala ngawo ukufudukela ezindaweni zasemadolobheni ngenhloso yokufuna ukuphila impilo engcono kanye namthuba emisebenzi. Lokhu kube sekushintsha indlela abantu abakhuliswa nabaphila ngayo. Isizwe samaZulu sidume ngokugcina amasiko aso, ukuhlonipha, ukuphilisana, nokubekezelelana kugwema ukuthi isizwe singanhlanhlathi sihlale emzileni ukuze singalahlekelwa isithunzi. Ucwaningo luzophinde luveze lugxile kakhulu ekutheni abantu abangamaZulu embonini yamatekisi bawahlonipha baphinde bawalondoloze kanjani amasiko uma besekuhambeni bengekho emakhaya. Luzophinde lubheke umthelela wokugcinwa kwawo lama siko, kuqhathaniswe nendlela eyayiphilwa emandulo bengangafiki abantu abamhlophe. Ucwaningo luzobheka indlela impucuko yaseNtshonalanga ekhinyabeze nagayo amasiko okuphila nokuphilisana kwesizwe samaZulu. Ucwaningo lusebenzise injulalwazi i-socio cultural theory. Le njulalwazi ikwenza kubelula ukwenza lolu cwaningo ngokubheka indlela abantu abaphila ngayo emiphakathini. Lusebenzise indlela yeKhwalithethivu, ehlonzwe njengefanele ukwenza lolu cwaningo. Le pharadaymu ilekelelwe yileyo eyaziwa ngokuthi iPharadaymu Eqondayo. Lubalulekile lolu cwaningo ngoba luveza indlela abantu abangamaZulu embonini yezokuthutha ukuthi bawalondoloza kanjani amasiko abo ukuze angashabalali yize noma bengekho emakhaya. Kubalulekile ukuveza ukuthi zikhona izinselelo ezintsha neziqukethwe usikompilo esizweni ezibangelwe ukushintsha kwemithethosisekelo kahulumeni.INingizimu Afrika inemithethosisekelo eyishumi nane (14) eshicilelwe nelawula izwe laseNingizimu Afrika.